W Gardowi Pùbliczny Bibliotece w Wejrowie òdbëło sã pòstãpné zéńdzenié Diskùsjowégò Klubù Kaszëbsczi Ksążczi. 16 lëstopadnika nôleżnicë DKKK diskùtowelë ò dokazu Rómana Drzéżdżona Naju krëwia z antologie dzysdniowi kaszëbsczi prozë Chceta wiãcy krwie? Gôdka tikała m.jin. òkresleniô gatënkù historie òpisóny przez aùtora. Pòjôwiałë sã rozmajité bédënczi – òd historie Kaszëbów w XX w. pò hòrror ò kaszëbsczim Zombie, to je Ópim. Z czasã diskùsjô przeszła na ùniwersalné przesłanié dokazu i pitanié ò to, dlôcze wcyg w lëdzach pòjôwiô sã teskniączka za krëwią.
Ùczãstnicë pòtkaniô pòdczorchiwelë téż wiôlgą starã i mésterstwò, z jaczim R. Drzéżdżón skòmpònowôł dokôz, a òsoblëwie pierszé akapitë, gdze kòżdé słowò mô swòjã mòc i znaczënk.
Na placu béł téż aùtor, chtëren òpòwiedzôł ò tim, jak pòwstôwała Naju krëwia, i zagwësnił, że òpisónô w ni historiô je òpiartô na prôwdzëwëch wëdarzeniach.
Rôczimë serdeczno do ùdzélu w pòstãpnëch zéńdzeniach Diskùsjowégò Klubù Kaszëbsczi Ksążczi. Infòrmacje ò témach pòtkaniów i terminach bãdą sã pòjôwiałë na internetowi starnie biblioteczi (http://biblioteka.wejherowo.pl/). W gòdnikù ùczãstnicë mdą gôdelë ò dokazu Stanisława Janczi Psë. Jeżlë chtos chce gò przeczëtac przed zéńdzenim, mòże zgłosëc to w bibliotece i pòżëczëc ksążkã z tim òpòwiôdanim.