DKK Kaszubskiej

23 gromicznika Diskùsjowi Klub Kaszëbsczi Ksążczi pòtkôł sã w wejrowsczi bibliotece, żebë pòkôrbic ò pòstãpnym dokazu. Nôleżnicë Klubù ùdbelë so tim razã pògadac i przeanalizowac òpòwiôdanié „Òdpùst” Eùgeniusza Gòłąbka. Delë bôczenié przédno na bëlné òddanié òdpùstowi jawernotë. Czëtińc mô wrażenié, że razã z bòhatérama ti pòwiôstczi przecëskô sã przez rzmë lëdztwa, czëje te same pôchë, co òni, widzy wszelejaczé „bùdë”. Aùtorowi ùdało sã to òddac zebranim w tim krótczim teksce rozmajitëch drobnotów, jaczé pògłãbiwają naje òdczëcé bëcégò swiôdkã òpisowónëch wëdarzeniów.
Bëlno w tim òpòwiôdanim je téż pòkôzónô swiąda grzéchù i winë, jaką czëją młodi lëdzy, chtërny próbùją wëapartnic sã westrzód jinëch np. wëszczérzanim sã z kaléków... Òsoblëwie mòcno je to widzec w przëtrôfkù knôpa, jaczi kradnie jednã z pamiątków z „òdpùstowi bùdë”, a pózni mô wrażenié, że wszëtcë wkół wiedzą ò tim i pòkazywają so gò pôlcama.
Kąsk żôl, że tak pò prôwdze E. Gòłąbk nie próbòwôł wicy ùsadzac szlachùjącëch za „Òdpùstã” lëteracczich ùsôdzków.
Pòstãpné zéńdzenié bãdze namienioné dokazowi Mariana Jelińsczégò „Na gòscënie”. Chto chce gò przeczëtac przed zéńdzenim, mòże zgłosëc to w bibliotece i dostónie gò w elektronyczny wersji na majla abò wëdrëkòwóny w sedzbie biblioteczi w Wejrowie.
Wszelejaczé infòrmacje ò témach pòtkaniów i terminach bãdą sã pòjôwiałë na internetowi starnie biblioteczi