DKK Kaszubskiej

Òbczas pòtkaniô Diskùsjowégò Klubù Kaszëbsczi Ksążczi, jaczé bëło 27 łżëkwiata w wejrowsczi bibliotece, nôleżnicë gôdelë ò dokazu Piotra Léssnawë „Slédnô pòbitwa ò Kaszëbë”. Òstôł òn napisóny i wësłóny na kònkùrs na pòwiôstkã science-fiction pò kaszëbskù òrganizowóny przez redakcjã gazétë „Kurier Bytowski”.
Ùczãstnicë zéńdzeniô pòdczorchiwelë, że w teksce P. Léssnawë mómë czekawò zbùdowóny swiat, w jaczim dzeje sã akcjô, chòc tak pò prôwdze słëchałobë jesz barżi wëfùlowac gò dialogama i nacéchòwac bòhatérów. „Je to bëlny wstãp do ksążczi, jakô wcyg czekô na dokùńczenié” – pòjôwiałë sã głosë òbczas kôrbiónczi.
Na pòtkanim béł téż aùtor, chtëren rzekł, że „Slédnô pòbitwa ò Kaszëbë” bëła dlô niegò dopiérze pòczątkã lëteracczi przigòdë i zgòdzył sã, że wôrt bëłobë do ni wrócëc i zbògacëc ùsadzony wnenczas swiat.
Rôczimë do ùdzélu w comiesãcznëch  pòtkaniach Diskùsjowégò Klubù Kaszëbsczi Ksążczi.
Wszelejaczé infòrmacje ò témach pòtkaniów i terminach bãdą sã pòjôwiałë na internetowi starnie biblioteczi we Wejrowie